اسلام آباد۔31مارچ(اے پی پی):صدر مملکت ڈاکٹر عارف علوی انشورنس کمپنی کوں متوفی پالیسی ہولڈر دی بیوہ کوں ڈیتھ انشورنس کلیم ادا کرݨ دی ہدایت کرݙتی اے ۔ انشورنس کمپنی متوفی شوہر دی طرفوں ڄاݨ ٻجھ تے بیماری لکاوݨ دے عذر تے بیوہ کوں انشورنس کلیم ادائیگی توں انکار کرݙتا ہئی ۔ ایوان صدر دے پریس ونگ موجب صدر مملکت اے فیصلہ شکایت کنندہ شہناز اختر دی طرفوں وفاقی انشورنس محتسب دے فیصلے دے خلاف دائر کیتی ڳئی اپیل کوں قبول کریندے ہوئیں ݙتے جیں دے تحت ایں کیس کوں ایں بنیاد تے بند کرتے نبیڑ ݙتا ڳیا ہئی جو بیوہ کوں ایںدے مرحوم شوہر دے اکاؤنٹ توں 1.5 لکھ روپے دی کٹوتی کیتی ڳئی پریمیم دی رقم واپس کر ݙتی ڳئی اے تے چونکہ معاملہ ہمدردی دی بنیاد تے طے پا ڳیا ہئی ، ایویں ، کمپنی موت دے بیمہ دے دعوے دی ادائیگی دی ذمہ دار کائنی رہی ۔ وفاقی انشورنس محتسب دے فیصلے دے خلاف شکایت کنندہ صدر مملکت کنے ھک درخواست دائر کیتی، جیں کوں انہاں قبول کر ڳھدا ۔ اپݨے فیصلے اچ ، صدر قرار ݙتے انشورنس کمپنی موت دے سرٹیفکیٹ دی بنیاد تے ایں دعوے کوں مستردکرݙتے جیں توں اے ظاہر تھیندے جو متوفی موت توں ھک سال پہلے توں ذیابیطس اتے جگر دی بیماری اچ مبتلا ہئی لیکن سرٹیفکیٹ اچ ایجھی کوئی مدت نی ݙسائی ڳئی ۔صدر انشورنس کمپنی کوں ہدایت کیتی اے جو او صدر دے حکم دی وصولی دے 30 ݙینھ اچ شکایت کنندہ کوں انشورنس کلیم ادا کرے۔
