اسلام آباد۔7ستمبر(اے پی پی)وزیراعظم عمران خان دی اڳواݨی اچ وفاقی کابینہ دا اجلاس تھئے جئیں برطانیہ ولوں پاکستان کوں کرونا ریڈ لسٹ اچ رکھݨ تے اعتراض کیتے اتے ایں سانڳے برطانوں حکومت دیاں وجوہات تے عدم اطمینان کیتا ڳئے۔ اجلاس توں بعد میݙیا بریفنگ اچ وفاقی وزیر اطلاعات فواد چودھری آکھیے جو ریڈ لسٹ بارے ڈاکٹر فیصل برطانیہ دے چیف میڈیکل سائنٹسٹ نال الائے اتے اساں وݙی حد تئیں ڈیٹا بارے برطانیہ دا چنتا مکا ݙتے۔ انہاں آکھیا جو وفاقی کابینہ مجرماں دی حوالگی بارے معاہدے دی یادداشت (ایم او یو) تے وی الائے۔ فواد چودھری آکھیا جو سینما انڈسٹری دی بحالی کیتے غیربھارتی پنجابی فلماں پاکستان اچ چلاوݨ تے غور کیتے ڄݙاں جو بھارت دے علاہ ساریاں بین الاقوامی فلماں دی پاکستان اچ درآمد دی اجازت سانڳے سمری ترمیم نال ولا پیش کرݨ دا فیصلہ کیتا ڳئے،جیکر اساں فلم انڈسٹری کیتے اقدامات نہ کیتے تاں اے صںعت بالکل بند تھی ویسی، ایں سانڳے ہک فلم پیکج آندا پئے جیندا اعلان آندے ہفتے کیتا ویسی۔ انہاں آکھیا جو وزیراعظم چنتا کیتے جو غریب لوکاں دی زمین زبردستی کھسݨ قابل گرفت اے، خصوصاً اسلام آباد اچ وستیاں دی زمین کھسی ڳئی اے، اے زمین ولا من پسند بیورو کریٹس، ججز اتے صحافیاں کوں پلاٹ ٻݨا تے ونݙی ڳئی، وزیر اعظم عمران خان وفاقی وزیر اسد عمر دی اڳواݨی اچ ہک کمیٹی ٻݨآعی اے جیندے اچ شیریں مزاری، شہزاد اکبر اتے فروغ نسیم وی ہوسن اتے اے کمیٹی غریباں دی زمین کھسڄݨ توں بچاوݨ اتے اوندے تے ہائوسنگ سوسائٹیاں نہ ٻݨݨ ݙیوݨ کیتے جامع پالیسی ݙیسی۔ فواد چوہدری آکھیا جو کرونا مریضاں کوں لڳݨ آلے ریمز وائر انجیکشن دی قیمت 5 ہزار 680 روپے توں ڳھٹا تے 3 ہزار 967 روپے رکھی ڳئی اے، پاکستان میڈیکل کمیشن ے ملازمین کیتے رضاکارانہ سروے اسکیم اتے گولڈن شیک ہینڈ دی منظوری ݙتی ڳئی اے۔
