کراچی۔13اگست (اے پی پی):وزیر محنت و افرادی قوت سندھ سعید غنی پاکستان دے 75ویں یوم آزادی دے موقع تے پوری پاکستانی قوم کوں 75ویں یوم آزادی دی مبارخ ݙیندے ہوئیں آکھیے جو جشن آزادی دے 75 ویں سال اچ پاکستان کوں اڳوں گھن ونڄݨ دا اساکوں عہد کرݨا اے ، پاکستان اچ ھک آئینی و جمہوری حکومت دا تسلسل اڳوں ودھاوݨ دی ڳالھ کرݨی اے ، پاکستان اچ پارلیمنٹ تے آئین دی بالادستی دی ڳالھ کرݨی اے ، پاکستان اچ عدلیہ دی آزادی دی ڳالھ کرݨی اے، پاکستان اچ لوکاں دے بنیادی حقوق دی دستیابی دی ڳالھ کرݨی اے تے پاکستانیاں کوں وسائل میسر کرݨن اتے حقوق انہاں کوں ݙیوݨے ہن جنہاں دا آئین پاکستان انہاں دا وعدہ کریندے ، اساں رہوں یا نہ رہوں پاکستان کوں قائم و دائم رہݨا اے۔ پاکستان دے 75 ویں یوم آزادی دے حوالے نال ہفتے کوں جاری کیتے ڳئے ویڈیو پیغام اچ سعید غنی آکھیے جو ایں سال جݙاں اساں آپݨا یوم آزادی منیندے پیوں ساݙے ملک دے ٻہوں سارے شہری اوکھ توں ݙوچار ہن انہاں آکھیے بلوچستان اچ سیلاب تباہی مچائی اے، خیبرپختونخواہ اچ ضیان تھئے ، پنجاب دے کجھ علاقیں اچ ضیان دے نال نال سندھ دے کئی ضلعیں چ مینھ پاروں ضیان تھئن ایں موقع تے اساکوں انہاں بھیݨ بھراویں کوں یاد رکھݨا چاہیدے جیڑھے جو تکلیف وچ ہن ۔
