اسلام آباد۔23مارچ (اے پی پی) چیئرمین سینیٹ محمد صادق سنجرانی آکھیا جو 23 مارچ دا ݙینھ تاریخی اہمیت رکھیندے، ایں ݙینھ اساݙے وݙیاں قائداعظم دی اڳواݨی اچ اپݨی تقدیر بدلݨ دا فیصلہ اتے انڄ ریاست ٻݨاوݨ کیتے لائحہ عمل ٻݨایا۔ اڄ دے ݙینھ لاہور اچ قائد اعظم دی اڳواݨی اچ او تاریخ ساز قرارداد منظور کیتی ڳی جیڑھی بعد اچ قراردادپاکستان دے ناں نال مشہور تھئی۔ ایں قرارداد منزل دا نشابر شعور ݙتا جئیں پاروں صرف ست سالیں اچ مملکت پاکستان معرضِ وجود اچ آئی۔سینٹ سیکرٹریٹ موجب یوم پاکستان دے موقع تے اپݨے سنیھے اچ قوم کوں مبارخ ݙیندیں ہوئیں چیئرمین محمد صادق سنجرانی آکھیا جو اساکوں اے ݙینھ دی اہمیت کوں حقیقی معنیاں اچ سمجھݨ دی لوڑھ اے۔
