اسلام آباد۔15نومبر(اے پی پی) نگران وزیراعظم انوارالحق کاکڑ آکھیے پاکستان ریلوے دا مین لائن ون (ایم ایل ۔ون) منصوبہ سی پیک دا ھک اہم حصہ اے تے حکومت ایندی ترجیحی بنیاداں تے تکمیل یقینی بݨیسی ، منصوبے دی تعمیر اچ ماحولیاتی اثرات دا خصوصی خیال رکھیا ونڄے ،پاکستان اچ ریلوے دے شعبے اچ ٻاہرلی سرمایہ کاری دی وݙی صلاحیت موجود اے ۔ وزیراعظم آفس دے میڈیا ونگ توں جاری بیان موجب نگران وزیرِ اعظم انوار الحق کاکڑ دی صدارت اچ مین لائن۔ون (ایم ایل ون) منصوبے تے جائزہ اجلاس ٻدھ کوں اسلام آباد اچ تھئے ۔اجلاس اچ نگران وفاقی وزرا شمشاد اختر، سمیع سعید، مشیرِ وزیرِ اعظم احد خان چیمہ، معاون خصوصی جہانزیب خان اتے متعلقہ اعلی حکام شرکت کیتی۔اجلاس کوں مین لائن ۔ون منصوبے دی تکمیل دے مختلف مرحلے تے تعمیری ہدف بارے ݙسایا ڳئے ۔ اجلاس اچ ݙسایا ڳئے جو منصوبے دے حوالے نال منصوبہ بندی چھیکڑی مرحلے وچ اے جݙاں جو آندے سال دے شروع اچ منصوبے دا منڈھ ٻدھیا ویسی ، اجلاس کوں مزید ݙسایا ڳئے جو منصوبہ ݙو مرحلے اچ بݨایا ویس ۔ پہلے مرحلے اچ کراچی توں ملتان 930 کلومیٹر ریلوے لائن وچھائی ویسی ۔ ایں حصے اچ 2022 اچ چھل دی زد اچ آوݨ آلے ریلوے انفراسٹرکچر کوں وی بین الاقوامی معیار دے مطابق جدت ݙتی ویسی ۔ ݙوجھے مرحلے اچ ملتان توں پشاور 796 کلومیٹر دا حصہ ہوسی۔ اجلاس کوں مزید ݙسایا ڳئے جو منصوبے کوں ایں طرز نال بݨایا ویندا پئے جو مستقبل اچ ریلوے کوں لوڑھ دے مطابق مزید جدت وی ݙتی ونڄ سڳسی ۔ وزیرِ اعظم ہدایت کیتی جو منصوبے دے ہدف کوں متعین کیتے ڳئے ویلھے اچ مکمل کیتا ویسی ۔ وزیرِ اعظم مزید ہدایت کیتی جو پاکستان ریلوے اچ اصلاحات تے جامع منصوبہ بندی کرتے وختی پیش کیتی ونڄے تاں جو ایم ایل ۔ ون منصوبے دے ثمرات توں پورا فیدہ چاتا وںج سڳے۔ انہاں آکھیے جو مین لائن ون منصوبے دی شروعات اتے ریلوے دی اصلاحات نگران حکومت دی اولین ترجیح اے۔مین لائن ون منصوبہ پاکستان اچ مواصلاتی بنیادی ڈھانچے دی ترقی اچ خصوصی اہمیت رکھیندے ۔ مین لائن ۔ون منصوبہ قومی نوعیت دا ایجھا منصوبہہ اے جیڑھا ملک اچ ٹرانسپورٹ شعبے اچ انقلاب گھن آسی ۔ انہاں ہدایت کیتی جو پاکستان ریلوے اچ اصلاحات گھن آتے ایندی صلاحیت توں بھرپور فیدہ چاتا ونجے ۔مین لائن ون منصوبے دے اہداف دے ویلھے اچ اینکوں پورا کیتا ونڄے ۔منصوبے دی تعمیراچ شفافیت دا خاص خیال رکھیا ونڄے۔ وزیراعظم آکھیے منصوبے پاروں ملک اچ روزگار دے نویں موقع بݨسن تے سامان دی ترسیل دی لاڳت گھٹ ہوسی ۔ منصوبہ پورا تھیوݨ نال سفری لاڳت اتے درکارویلھا گھٹ ویسی ۔منصوبے نال پاکستان دی بندرگاہواں دے نہ صرف ملک دے معاشی مراکز توں مواصلاتی رابطے بہتر تھیسن بلکہ سی پیک دے تحت خطے دے ݙوجھے ملکاں کیتے ٹرانزٹ روٹ دا مقصد وی پورا تھیسی ۔
