اسلام آباد۔12اپریل (اے پی پی):وزیراعظم شہباز شریف منڳل کوں وزیراعظم آفس پڄ تے ذمہ واریاں دی باضابط انجام دہی شروع کرݙتی اے، وزیراعظم شہباز شریف مقررہ دفتری اوقات شروع تھیوݨ توں پہلے ہی سویلے 8 وڄے دفتر پڄ ڳئے جݙاں جورمضان المبارک اچ سرکاری اوقات کار دے مطابق دفترسویلے 10 وڄے کھلدن ۔ وزیراعظم آفس دے میڈیا ونگ دی طرفوں جاری بیان موجب وزیراعظم شہباز شریف ہفتے اچ ݙو دے بجائے ھک دی چھٹی دی ہدایت کیتی اے جݙاں جو سرکاری دفتر دے اوقات کار اچ تبدیلی کریندے ہوئیں دفتر 10 وڄے دی بجائے 8 وڄے کھولݨ دی ہدایت کیتی اے ۔ دریں اثناء وزیراعظم شہباز شریف دے آفس سنبھلیندے ہی عوام کوں ریلیف ݙیوݨ دے انہاں اعلانات تے عملدرآمد دا آغاز تھی ڳئے ۔ وزیراعظم شہباز شریف گزریل ݙینھ قومی اسمبلی اچ کیتے ڳئے اپݨے اعلانات تے عملدرآمد دے احکامات جاری کیتے۔ انہاں ہدایت کیتی جو رمضان المبارک دے دوران سستے بازاراں اچ معیاری اتے ارزاں نرخاں تے چیزاں دی فراہمی یقینی بِݨائی ونڄے ۔ انہاں رمضان بازاراں دی سخت مانیٹرنگ یقینی بݨاوݨ دی وی ہدایت کیتی ۔ وزیراعظم خبردار کیتے جو عوام کوں سستی چیزاں دی فراہمی اچ غفلت برداشت نہ کیتی ویسی ، انہاں پنشنرز دی پینشن اچ ودھارے ، گھٹ توں گھٹ اجرت 25 ہزار کرݨ دے اعلانات تے فی الفور عملدرآمد دا حکم وی جاری کیتا۔ وزیراعظم شہباز شریف نال وزیراعظم آفس دے افسران اتے عملے ملاقاتاں کیتیاں ۔ وزیراعظم انہاں کوں ہدایت کیتی جو او کمر ہمت کس گھنن، اساں عوام دی خدمت کیتے آئن ، ھک لمحہ مزید ضائع کیتے بغیر عوام دی خدمت کریسوں ۔ انہاں آکھیے جو ایمان داری، شفافیت، مستعدی، انتھک محنت ساݙے راہنما اصول ہن۔
