اسلام آباد۔6اپریل (اے پی پی) قومی اسمبلی خمیس کوں قومی اسمبلی اچ پنجاب عام انتخابات ازخود نوٹس کیس بارے قرارداد دی منظوری ݙے ݙتی جئیں اچ آکھیا ڳیا جو ترائے رکنی بنچ دے فیصلے کوں پارلیمان مسترد کریندی اے اتے آئین تے قانون دے مطابق اکثریتی بنچ دے فیصلے کوں نافذ العمل قرار ݙیندی اے۔ قرارداد اچ وزیراعظم اتے وفاقی کابینہ کوں پابند کیتا ڳے جو او خلاف آئین تے قانون فیصلے تے عمل نہ کرن اتے سپریم کورٹ دے فل کورٹ توں ایں تے نظرثانی دا مطالبہ کیتا ڳے۔ قومی اسمبلی اچ وفاقی وزیر پارلیمانی امور مرتضیٰ جاوید عباسی ایوان اچ تحریک پیش کیتی جو رولز معطل کر تے قرارداد پیش کرݨ دی موکل ݙتی ونڄے جئیں دی منظوری دے بعد بلوچستان عوامی پارٹی دے پارلیمانی لیڈر خالد مگسی ایوان اچ قرارداد پیش کیتی جو 28 مارچ 2023ء کوں ایں ایوان دی منظوری تھئی قرارداد اچ ازخود نوٹس کیس نمبر ہک 2023ء اچ سپریم کورٹ دے چار معزز جج صاحبان دے اکثریتی فیصلہ دی تائید کریندیں ہوئیں ایں تے عملدرآمد اتے اعلیٰ عدلیہ نال سیاسی تے انتظامی معاملیاں اچ مداخلت توں گریز دا مطالبہ کیتا ہئی۔ قرارداد اچ آکھیا ڳیا جو اے اجلاس آئین پاکستان دے آرٹیکل 184 (3) دے تحت دائر مقدمات کوں فل کورٹ اچ سماعت کیتے مقرر نہ کرݨ دی عدالت عظمیٰ دے ترائے رکنی بنچ دے فیصلے دی تائید نہ کریندا اتے ہک ایگزیکٹو سرکلر دے ذریعے ایں تے عملدرآمد روکݨ دے فیصلے کوں تشویش دی نظر نال ݙیکھدے۔ سپیکر قرارداد ایوان اچ پیش کیتی جئیں کوں منظور کر ڳھدا ڳیا۔
