جنيوا -13 نومبر (اي پي پي) صحت جي عالمي اداري جي ڊائريڪٽر جنرل ٽيڊروس ايڊيهم گبريس چيو آهي، ته تنظيم جو غزه جي شفا اسپتال مرڪز سان رابطو ڪٽجي ويو آهي. صحت جي عالمي اداري جي ڊائريڪٽر جنرل سوشل ميڊيا پليٽ فارم ايڪس تي جاري بيان ۾ چيو ته غزه جي شفا اسپتال تي اسرائيلي حملا ڳڻتي صورتحال آهن جنهن سبب اداري جو شفا اسپتال جي مرڪز سان رابطو ڪٽجي ويو آهي. مرڪز مان مليل آخري رپورٽ مطابق اسپتال ٽينڪن جي گهيري ۾ آهي ۽ اسپتال مان فرار ٿيندڙن تي فائرنگ ڪري کين زخمي يا ماريو پيو وڃي. هن چيو ته غزه ۾ انسانن جون حياتيون بچائڻ جو واحد رستو فوري جنگبندي آهي، اسان ٻيهر جنگ بندي جي اپيل جو ورجاءُ ڪيون ٿا.
