راولپنڈی ۔7دسمبر(اے پی پی) سابق وزیراعظم اتے پاکستان پیپلز پارٹی دے مرکزی رہنما سینیٹر سید یوسف رضا گیلانی، وفاقی وزیر سردار ایاز صادق اتے وزیراعظم دے مشیر قمر زمان کائرہ ٻدھ کوں پاکستان مسلم لیگ (ن) دی مرکزی رہنماء سینئر پارلیمنٹیرین بیگم نجمہ حمید مرحومہ دے انتقال تے تعزیت کیتے انہاں دے گھر ڳئن تے مرحومہ نجمہ حمید دے گھرآلے، صاحبزادیں، بھیݨ طاہرہ اورنگزیب اتے بھنڑینجی وفاقی وزیر اطلاعات مریم اورنگزیب سودھے گھر آلیں نال تعزیت کیتی ۔ یوسف رضا گیلانی، قمر زمان کائرہ اتے سردار ایاز صادق بیگم نجمہ حمید دی ملک و قوم اتے جمہوریت کیتے خدمات دی تعریف کیتی ۔ ایں موقع تے ڳالھ کریندے ہوئین یوسف رضا گیلانی آکھیے جو نجمہ آپا سیاسی اختلاف دے باوجود ذاتی اتے شخصی احترام تے یقین رکھݨ آلی عظیم تریمت ہن ۔ انہاں آکھیے جو محترمہ بے نظیر بھٹو شہید، بیگم نصرت بھٹو، بیگم کلثوم نواز اتے بیگم نجمہ حمید او تریمت ہن جنہاں پاکستان دی سیاست، جمہوریت اتے عوام کیتے تاریخی جدوجہد کیتی۔ قمر زمان کائرہ آکھیے نجمہ آپا مسلم لیگی ہووݨ دے باوجود ٻئی جماعتاں دے رہنماواں اچ وی مقبول ہن ، او ھک انتہائی اخلاق آلی تریمت ہن، او ساریں دی آپا ہن ، سارے انہاں دا احترام کریندے ہن ۔ سردار ایاز صادق آکھیے جو نجمہ آپا آہنی عزم و ارادے دی مالک تریمت ہن ، او تقریر نہ کریندیاں ہن ، عمل کرتے ݙکھیندیاں ہن ۔ انہاں آکھیے دور آمریت اچ بیگم کلثوم نواز نال بیگم نجمہ حمید تاریخی کردار بݨ تے ابھریں۔ سید یوسف رضا گیلانی، قمر زمان کائرہ اتے سردار ایاز صادق مرحومہ دے اچے درجے اتے انہاں دے گھر آلیں کیتے صبر دی دعا منگی۔
