اسلام آباد۔3جولائی(اے پی پی)صدر مملکت آصف علی زرداری تریمتیں دی معاشی خودمختاری کیتے مالی خدمات اتے قرضیاں تئیں پڄ ودھاوݨ دی لوڑھ تے زور ݙیندے آکھیے جو وپار پیشہ تریمتیں دی حوصلہ افزائی اتے بینکنگ دے شعبے اچ نمائندگی ودھائی ونڄے۔ اے ڳالھ انہاں سٹینڈرڈ چارٹرڈ بینک دے گروپ چیف ایگزیکٹو بل ونٹرز دی اڳواݨی اچ وفد نال الیندے آکھی۔ انہاں آکھیا جو تریمتیں دی معاشی خودمختاری نال خانداناں دی خوشحالی اتے ملکی ترقی اچ مدد ملسی، پاکستان ماحولیات دے تحفظ اتے جنگلات دے ودھارے کیتے اقدامات کیتن، حکومت ِسندھ مینگروو جنگلات لگا تے عالمی مارکیٹ اچ کاربن کریڈٹس دی تجارت نال زرِمبادلہ کمائے۔ انہاں آکھیا جو موسمیاتی شعبے اچ سرمایہ کاری نال ماحولیات دے تحفظ اچ مدد ملسی۔ انہاں زرعی شعبے اتے بنیادی ڈھانچے دے منصوبیاں خاص کر چھوٹے ڈیماں، بیراجاں اتے پاور پلانٹس اچ سرمایہ کاری تے زور ݙیندے آکھیے جو بینک کساناں دی زرعی ضروریات تئیں پڄ ودھاوݨ کیتے مالیاتی خدمات، قرضے ݙیون۔ وفد صدر ِمملکت کوں پاکستان دی معیشت، بینکنگ انڈسٹری دی ترقی، ملکی سماجی اتے اقتصادی ترقی اچ بینک دے کردار دا ݙسائے۔ صدر ِمملکت بینک کوں پاکستان اچ کامیاب آپریشنز دے 160 سال مکمل تھیوݨ تے مبارک ݙتی۔ انہاں آکھیا جو بینک ملک دے بینکنگ سیکٹر دے ارتقاء اچ ٻہوں چنڳاں کردار ادا کیتے۔ انہاں امید کیتی جو بینک ملک اچ اپݨے آپریشنز کوں ودھیسی اتے ملکی معیشت اچ چنڳاں کردار ادا کریندا رہسی۔(
.jpg)