اسلام آباد۔5فروری(اے پی پی)صدر مملکت ڈاکٹر عارف علوی آکھیے جو پاکستان بھارت دے غیر قانونی زیر قبضہ جموں و کشمیر دے تنازعہ دا اقوام متحدہ دی سلامتی کونسل دی قرار داداں دے مطابق پرامن حل چاہندے جیندے اچ مظلوم کشمیری عوام کوں حق خود ارادیت دی ضمانت ݙتی گئی اے، مقبوضہ کشمیر کݙاھیں وی بھارت دا حصہ نئیں ریہا اتے غیرقانونی مقبوضہ علاقہ کوں اپݨا حصہ قرار ݙیوݨ دے بھارتی آئین کوں وی نئیں منیا۔ یوم یکجہتی کشمیر سانڳے اسلام آباد اچ دفتر خارجہ توں ڈی چوک تئیں ریلی دی اڳواݨی دے بعد خطاب اچ انہاں آکھیا جو پاکستان کشمیر دے موقف تے ݙٹیا ہوئے، بھارت اپݨیاں پالیسیاں نال اپݨے آپ کوں ٻھاہ اچ سٹی ویندے۔ ریلی اچ چیئرمین سینیٹ محمد صادق سنجرانی، سپیکر قومی اسمبلی اسد قیصر، ڈپٹی سپیکر قومی اسمبلی قاسم خان سوری، پارلیمانی کشمیر کمیٹی دے چیئرمین شہریار خان آفریدی، وزیرداخلہ شیخ رشید احمد، وزیر مذہبی امور پیر نور الحق قادری سودھا وزرا، اراکین پارلیمنٹ، حریت رہنماواں وی شرکت کیتی۔
