اسلام آباد۔13مئی(اے پی پی):وفاقی وزیر ماحولیاتی تبدیلی سینیٹر شیری رحمان اتے وزیر مملکت فیصل کریم کنڈی آکھیے پی ٹی آئی دے جتھیں او کم کیتن جیڑھے ملک دشمن 75سال اچ وی نہ کرسڳیے ، عمران خان اتے تحریک انتشار ملک کوں ضیان پڄائے ، عمران نیازی خود کوں ریاست اتے قانون توں بالا سمجھدن ، جتھیں دے خلاف ہر صورت کارروائی کیتی ویسی سارے شرپسنداں کوں قانون دی کچاری اچ گھن آیا ویسی ، وزیر مملکت فیصل کریم کنڈی دے رلے مشترکہ پریس کانفرنس توں خطاب کریندے ہوئیں وفاقی وزیر سینیٹر شیری رحمان آکھیے عمران خان دی سیاسی جماعت ملک دا جیڑھا حال کیتے او ہݨ تحریک انتشار بݨ چکی اے۔ گزریل ݙینھ دے تحریک انتشار دے اقدامات توں ملک اچ کوئی بندہ نی بچیا تے نا ہی ریاست کوں چھوڑیا ڳئے ،انہاں آکھیے عمران نیازی حاضر سروس فوجی افسر اتے آرمی چیف تے الزام لاتے، انہاں سوال کیتے جو 9مئی توں ملک اچ انتشار دی سیاست دا کیامطلب اے؟ انہاں دے قول و فعل توں نظر آندے جو عمران خان ریاست اتے قانون توں خود اُتے سمجھدن ، عمران خان دا آکھݨ اے جو میں ہاں تاں پاکستان اے، میں کائنی تاں پاکستان کائنی،اے غلط اتے خطر ناک پیغام اے۔ انہاں آکھیے تشدد کرݨ آلیں تے عمران نیازی اچ کوئی فرق کائنی کیوں جو انہاں اہم قومی املاک اتے حساس تنصیبات دے علاوہ جناح ہائوس کوں ساڑ ݙتے ، شہریاں کوں تکلیف پڄائی ، امتحان ملتوی تھئن ، لوکاں دے گھراں اچ لٹ مار کرݨ آلیں دی پشت پناہی اتے حوصلہ افزائی کیتی ویندی پئی اے ۔ شیری رحمان آکھیے عدالت اچ عمران نیازی آکھدے جو میکوں کوئی پتہ کائنی جݙاں جو ٻاہر آتے آکھدے جے میکوں گرفتار کیتا ڳیا تاں ایویں ہی تھیسی ۔
