اسلام آباد۔3اگست(اے پی پی) عراق دے ریپڈ رسپانس یونٹ دے کمانڈر لیفٹیننٹ جنرل ڈاکٹر تہامیر اسماعیل دی سربراہی اچ اعلی سطح دے وفد وفاقی وزیرداخلہ و انسداد منشیات محسن نقوی نال ملاقات کیتی ۔ وزارت داخلہ آوݨ تے وفاقی وزیرداخلہ و انسداد منشیات محسن نقوی عراقی ریپڈ رسپانس یونٹ دے کمانڈرلیفٹیننٹ جنرل ڈاکٹر تہامیر اسماعیل اتے وفد دا خیر مقدم کیتا۔عراقی ریپڈ رسپانس یونٹ دے کمانڈر لیفٹیننٹ جنرل تہامیر اسماعیل اتے وزیرداخلہ و انسداد منشیات محسن نقوی وچال ملاقات اچ سانجھی دلچسپی دے امور، پاکستانی زائرین توں عراق اچ پاسپورٹ نہ گھنݨ تے زائرین کوں زیادہ سہولتاں ݙیوݨ تے ڳالھ مہاڑ کیتی ڳئی ۔ ملاقات اچ عراقی پولیس کوں پاکستان اچ تربیت ݙیوݨ تے سیف سٹی پراجیکٹ اچ تعاون تے وی ڳالھ مہاڑ تھئی جݙاں جو غیر قانونی امیگریشن اتے انسانی سمگلنگ روکݨ سانڳے سانجھے اشتراک کار ودھاوݨ تے ڳالھ مہاڑ تھئی ۔ عراقی وفد وفاقی وزیر داخلہ محسن نقوی کوں عراق دورے دی دعوت ݙتی۔ وفاقی وزیر داخلہ محسن نقوی عراقی ریپڈ رسپانس یونٹ دے کمانڈر لیفٹیننٹ جنرل ڈاکٹر تہامیر اسماعیل تے وفد نال ڳالھ مہاڑ کریندے آکھیے عراق ونڄݨ آلے زائرین توں پاسپورٹ نہ گھنݨ دی تجویز وختی اقدامات دی متقاضی اے۔ امید اے عراقی حکومت ایں تے وختی حتمی فیصلہ کریسی ۔ پاکستان عراقی بھیݨ بھراویں سانڳے ویزہ فری دیاں سہولتاں ݙیوݨ دا فیصلہ کیتے ، انشاللہ وختی عمل شروع تھی ویسی ۔ انہاں مزید آکھیےعراقی پولیس دی تربیت سانڳے ہر ممکن تعاون کریسوں جݙاں جو سیف سٹی پراجیکٹ اچ عراق نال ہر سطح تے تعاون کریسوں ۔ کمانڈر عراقی ریپڈ رسپانس یونٹ لیفٹیننٹ جنرل ڈاکٹر تہامیر اسماعیل آکھیے پاکستانی زائرین توں پاسپورٹ نہ گھنݨ دے حوالے نال ڈی جی پاسپورٹ نال ڳالھ کیتی ویسی ، امید اے ایشو حل تھی ویسی ۔ انہاں آکھیے پاکستان توں آوݨ آلے بھیݨ بھرا اساں کیتے قابل احترام ہن ۔ عراقی وفد اچ بریگیڈئر جنرل کمانڈر آف پروٹیکشن رجمنٹ عقیل کاظم، بریگیڈئر جنرل عبدالحسین، محمد سہیل اتے ٻئے شامل ہن ۔ وفاقی سیکرٹری داخلہ خرم علی آغا اتے ایم ڈی این آر ٹی سی بریگیڈئرمحمد عاصم وی ایں موقع تے موجود ہن
