استنبول۔14دسمبر (اے پی پی) پاکستان اتے ترکیہ وچال سانجھی نشریات، ترک ڈرامے پاکستان اچ ݙکھاوݨ، وزارت اطلاعات اتے ترکیہ دے ڈائریکٹوریٹ آف کمیونیکیشنز وچال ورکنگ گروپ ٻݨاوݨ تے اتفاق تھی ڳئے۔ وفاقی وزیر اطلاعات تے نشریات عطاءاللہ تارڑ جیڑھے جو ترکیہ دے سرکاری دورے تے ہن، ترکیہ دے صدارتی ہیڈ آف کمیونیکیشنز پروفیسر فحرتین التون نال ملاقات کیتی۔ ملاقات اچ میڈیا دے شعبے اچ تعاون مضبوط ٻݨاوݨ، عوامی سفارت کاری ودھاوݨ، اسلاموفوبیا اتے مس انفارمیشن دے خاتمے، میڈٰیا وفود دے تبادلے اتے مشترکہ پروڈکشنز ٻݨاوݨ سودھے اہم معاملیاں تے ڳالھ مہاڑ تھئی۔ ایں موقع تے ڳالھ مہاڑ کریندیں ہوئیں وفاقی وزیر اطلاعات آکھیا جو پاکستان اتے ترکیہ وچال تاریخی اتے برادرانہ تعلقات ہن۔ ݙوہیں ملکاں وچال میڈیا دے شعبے اچ تعاون دے ٻہوں موقع موجود ہن۔ وفاقی وزیر اطلاعات پروفیسر فحرتین التون کوں پاکستان دے دورہ دی دعوت وی ݙتی۔پروفیسر فحرتین التون پاکستان اچ میڈیا دی ترقی اچ دلچسپی ݙکھائی اتے آکھیا جو ترک ڈرامہ ارطغرل غازی پاکستان اچ ٻہوں مقبول تھیے۔ انہاں آکھیا جو پاکستانی فنکاراں اتے موسیقاراں ترکیہ اچ ٻہوں پسند کیتا ویندے۔ انہاں آکھیا جو ݙوہیں ملکاں وچال میڈیا تعاون نال اسلاموفوبیا اتے مس انفارمیشن دے خلاف جنگ اچ مدد ملسی۔ وفاقی وزیر اطلاعات عطاءاللہ تارڑ ترک میڈیا تے کشمیر بارے کوریج تے پروفیسر فحرتین التون دا شکریہ ادا کیتا۔
